Тропарь, глас 8

В терпении твоем стяжал еси мзду твою, отче преподобне, в молитвах непрестанно терпевый, нищия возлюбивый и сия удовливый, но молися Христу Богу, Иоанне милостиве, блаженне, спастися душам нашим.

Кондак, глас 2

Богатство твое расточил еси убогим и Небесное богатство ныне восприял еси, Иоанне всемудре, сего ради вси тя почитаем, совершающе память твою, милостыни о тезоимените!

Молитва

Святителю Божий Иоанне, милостивый защитниче сирых и сущих в напастех! К тебе прибегаем и тебе молимся, яко скорому покровителю всех ищущих от Бога утешения в бедах и скорбех. Не престай, моляся ко Господу о всех с верою притекающих к тебе! Ты, преисполнен сый Христовы любви и благости, явился еси яко чудный чертог добродетели милосердия и стяжал еси себе имя «милостивый». Ты был еси яко река, непрестанно текущая щедрыми милостьми и всех жаждущих обильно напаяющая. Веруем, яко по переселении от земли на небо, усугубися в тебе дар благодати сея и яко соделался еси неисчерпаемый сосуд всякия благостыни. Сотвори убо твоим ходатайством и заступлением пред Богом «всякия утехи», да вси, прибегающий к тебе, обретают мир и безмятежие: даруй им утешение в печалех временных и пособие в нуждах житейских, всели в них надежду вечнаго упокоения во Царствии Небеснем. В житии твоем на земли ты был еси пристанище всем сущим во всякой беде и нужде, обидимым и недугующим, и ни един от притекавших к тебе и просивших у тебе милости лишен бысть твоея благостыни. Тожде и ныне, царствуя со Христом на Небеси, яви всем покланяющимся пред честною твоею иконою и молящимся о помощи и заступлении. Не точию сам ты творил еси милость безпомощным, но и сердца других воздвигал еси ко утешению немощных и ко призрению убогих. Подвигни убо и ныне сердца верных к заступлению сирых, ко утешению скорбящих и успокоению неимущих. Да не оскудевают в них дары милости, паче же да вселится в них и в дому сем, призревающем страждущих, мир и радость о Духе Святе, во славу Господа и Спаса нашего Иисуса Христа, во веки веков. Аминь.

Тропарь, глас 4

Днесь вернии людие духовно торжествуем, прославляюще Заступницу усердную рода христианскаго и притекающе к Пречистому Ея образу, взываем сице: о, Премилостивая Владычице Богородице, подаждь нам нечаянную радость, обремененным грехи и скорбьми многими, и избави нас от всякаго зла, молящи Сына Твоего, Христа Бога нашего, спасти души наша.

Кондак, глас 6

Не имамы иныя помощи, не имамы иныя надежды, разве Тебе, Владычице, Ты нам помози, на Тебя надеемся и Тобою хвалимся, Твои бо есмы рабы, да не постыдимся.

Молитва

О, Пресвятая Дево, Всеблагаго Сына Мати Всеблагая, града сего покрове, всех сущих во гресех, скорбех, бедах и болезнех верная Предстательнице и Заступнице! Приими молебное пение сие от нас, недостойных рабов Твоих Тебе возносимое; и яко-же древле грешника, на всяк день многажды пред честною иконою Твоею молившагося, не презрела еси, но нечаянную радость покаяния тому даровала еси, и усердным к Сыну Твоему ходатайством Сего ко прощению грешника преклонила еси, тако и ныне не презри моления нас, недостойных раб Твоих, но умоли Сына Твоего и Бога нашего, да и всем нам, с верою и умилением пред цельбоносным образом Твоим покланяющимся, по коегождо потребе нечаянную радость дарует; да вси на небеси и на земли видят Тя, яко твердую и непостыдную Предстательницу рода христианского, и сие ведуще славят Тя и Тобою Сына Твоего со Безначальным Его Отцем и Единосущным Его Духом, ныне и присно и во веки веков. Аминь.

Многомилостивый Господи! Услыши прошение мое, прими молитву недостойного раба Твоего, не возгнушайся язв моих, не отвратись от мене. Яко-же иногда еси исцелил сребролюбивую душу Закхея мытаря, исцели и мою душу, болезнущую многими страстьми и бедами. Господи, вонми гласу моления моего, услыши стенания и жалкий вопль мой. О, горе мне, горе мне грешному, поелику уподобляюсь идолопоклонникам, не стыжусь воскурять фимиам бесовский, не стыжусь оскорблять Тебя, Господи, лукавством сердца моего. Искушаю Тебя чрезмерной надеянностью на Твое долготерпение. Стоя во Святем Храме Твоем, ублажаюсь благоуханием ладана, а по часе паки таяжде услаждаюсь курением зловония. Оскверняю уста мои и сими же устами глаголю словеса хвалебные к Тебе. Аки пес возвращается к своей блевотине, тако же аз греху служу. Всем бо яко грех есть сие, но не имам дерзновения отрещися мзды наемничей. Многомилостивый Господи! Снизойди моей немощи, прости мое непотребство, укрепи мя, даждь ми терпение и мужество душевное, не остави мене, не даждь мне погибнути в тине греховней, Спаси, Господи! Погибаю! Яко же иногда еси, Господи, исцелил, по молитвам Пречистой Матери Твоея, некоего мужа Сергия – исцели и мене недостойного. Якоже иногда еси Господи, избавил, по молитвам преподобного Амвросия Оптинского от скверной привычки некоего Алексея московскаго – избавь и мене окаянного. Якоже иногда еси Господи, свободил, по молитвам святых отец Киево-Печерских, от давлеющей страсти некоего Максима и поставил его служити Тебе во Святем Храме Твоем – тем же и мене сквернаго и нечистаго свободи, и даждь ми послужити правде Твоей, и поработати без лености тощно Тебе Господу моему Иисусу Христу во вся дни живота моего, ныне и присно и во веки веков. Аминь.

Святой мученик Авраамий Болгарский, Владимирский чудотворец, жил в XIII веке, происходил из камских болгар и воспитывался в мусульманстве. Он был добр и милостив к бедным и, когда Господь просветил его Светом разума, принял христианство. В городе Болгары, в низовьях Волги, святой Авраамий стал проповедовать соотечественникам об Истинном Боге. Его схватили и, предав мукам, казнили. В 1230 году мощи святого Авраамия были перенесены святым князем Георгием Всеволодовичем во Владимир. У его мощей происходили чудесные исцеления, поэтому он назван чудотворцем. Святому мученику молятся о здоровье детей и о благополучии обращающихся к нему с верой.

Тропарь, глас 4

Днесь, благовернии людие, сошедшеся, восхвалим добляго сего мученика и страдальца Авраамия: сей бо укрепляем силою Божиею душу свою положи за Христа, много пострадав от зловерных болгар. Сего ради от Господа венец прият, и ныне предстоит Ему и молится о граде сем и о всех нас, чтущих память его.

Молитва

Святый мучениче Авраамие, доблий воине Христа Царя Небеснаго, в скорбех и напастех преславный наш помощниче и защитниче! Ничто же возможе отлучити тя от любве ко Господу Иисусу, ни лестныя обещания благ временных, ни прещения, ни муки от злых врагов святейшия Христовы веры; ты, яко лев, изшел еси на брань против волков мысленных, духов злобы, подвигших на тя, ради добраго твоего исповедания, единоплеменный тебе народ болгарский, и, яко огненная стрела, тех поразил еси силою благодати Святаго Духа, и крепкия, яко смерть, любве твоея к Богу. Аще и пролиял еси кровь твою за Христа Бога нашего, погубив временную жизнь, обаче безсмертною душею, яко орел, воспарил еси в горния обители Отца нашего, наследовав там вечную жизнь, славу и блаженство неизреченное, и оставив нам нетленныя останки твоя, яко крин многоценный и благоуханный.

Веруем, страстотерпче святый, яко предстоя со Ангелы и всеми святыми престолу славы Триипостаснаго Бога, усердныя и богоприятныя возносиши молитвы не токмо о нас, о святей обители сей и граде нашем, но и о всей святей Христовой Церкви и о православной Русской державе. Веруем, преславный чудотворче, яко ты, силою всемогущаго Господа Иисуса Христа, чрез святыя мощи твоя, источаеши обильныя дары благодатныя помощи во спасение всем с верою к тебе притекающим, наипаче же испрашивает и кончину с покаянием тебе чтущим, и благосердно помогаеши немощным младенцам, да вси от мала до велика единодушно прославляем неисповедимое величие благости Божией. Тем же верою и любовию ко святым мощам твоим припадающе и благоговейно оныя лобызающе, умоляем тя, добрый на небеси наш молитвенниче и заступниче, помогай нам грешным и смиренным твоими молитвами во всех скорбех, нуждах и обстояниих наших, сохраняй нас, святую обитель сию и град сей от всякаго зла и всякия напасти, наипаче же споспешествуй вечному спасению нашему и всех просящих от тебе помощи и заступления.