Шрифт:
Молитва об исцелении архангелу Рафаилу
О святый великий архангеле Рафаиле, Престолу Божию предстояй! Ты благодатию, от Всемогущаго Врача душ и телес наших тебе данною, праведнаго мужа Товита от слепоты телесныя исцелил еси, и сына его Товию, спутешествуя ему, от злаго духа сохранил еси. Всеусердно моля тя, буди мне путеводитель в жизни моей. Сохрани от видимых и невидимых враг, исцели душевныя и телесныя болезни моя, управи жизнь мою к покаянию во гресех и ко творению добрых дел. О святый великий Рафаиле архангеле! Услыши молящегося тебе и сподоби в здешней и будущей жизни благодарити и славити общаго Создателя нашего в бесконечныя веки веков. Аминь.
Молитва святому великомученику и целителю Пантелеймону
Святый великомучениче и целителю Пантелеимоне, Бога милостиваго подражателю! Призри благосердием и услыши нас, грешных, пред святою твоею иконою усердне молящихся. Испроси нам у Господа Бога, Емуже со ангелы предстоиши на небеси, оставление грехов и прегрешений наших: исцели болезни душевныя же и телесныя рабов Божиих, ныне поминаемых, зде предстоящих и всех христиан православных, к твоему заступлению притекающих: се бо мы, по грехом нашим люте одержимы есмы многими недуги и не имамы помощи и утешения: к тебе же прибегаем, яко дадеся ти благодать молитися за ны и целити всяк недуг и всяку болезнь; даруй убо всем нам святыми молитвами твоими здравие и благомощие души и тела, преспеяние веры и благочестия и вся к житию временному и ко спасению потребная, яко да, сподобившися тобою великих и богатых милостей, прославим тя и Подателя всех благ, дивнаго во святых, Бога нашего, Отца и Сына и Святаго Духа. Аминь.
Для лечения отчаявшиеся больные нередко используют воду из святых источников – родников, расположенных в труднодоступных местах, над которыми людям являлись иконы Божией Матери. Считается, что она обладает чудесными исцеляющими свойствами. Наряду с Богоматерью поклонение природным ключам связывали со святой Параскевой Пятницей, являющейся христианской интерпретацией языческой Макоши.
Молитва целителю Пантелеймону от лица болящего чтомая
О великий угодниче Христов, страстотерпече и врачу многомилостивый, Пантелеимоне! Умилосердися надо мною, грешным рабом, услыши стенание и вопль мой, умилостиви Небеснаго, Верховнаго Врача душ и телес наших, Христа Бога нашего, да дарует ми исцеление от гнетущаго мя недуга. Прими недостойное моление грешнейшаго паче всех человек, посети мя благодатным посещением, не возгнушайся греховных язв моих, помажи елеем милости твоея и исцели мя; да здрав сый душею и телом, остаток дний моих, благодатию Божие, возмогу провести в покаянии и угождении Богу и сподоблюся восприяти благий конец жития моего. Ей, угодниче Божий! Умоли Христа Бога, да предстательством твоим дарует ми здравие телу и спасение души моей. Аминь.
Молитва святому Симеону Богоприимцу
О великий угодниче Божий Богоприимче Симеоне! Призри на мя грешнаго, ко святей иконе твоей припадающа и просяща твоего заступления и помощи: скорбь бо обдержит мя от обстоящих мя ныне бед и зол, и утешения не имам многоболезненней души моей. Исках помощи от человек, и не обретеся. Возопиях ко Господу, и не услыша мя, аз прогневах пречистую благость Его беззаконньми моими, и множеством многих грехов моих преогорчих человеколюбивую утробу Его. И кто ми ныне помощь явит; кто ми скорбь утолит; кто даст отраду и успокоение многомятежней душе моей? К тебе, великий угодниче Божий, прибегаю грешный и недостойный аз, ведый, яко велие дерзновение имаши ко Христу Богу и многомощен предстатель еси о всех, с верою к тебе прибегающих, и твоего заступления и помощи требующих. Моли бо Человеколюбца Гочода, яко да простив ми безчисленная моя прегрешения, не отвратит милость Свою от мене, но яко благ и сострадателен, явит и мне безконечное Свое милосердие, и в лютеем напастей и бед моих озлоблении подаст мне всесильную помощь Свою, и преогорченной душе моей ослабу, мир, укрепление, утешение и успокоение дарует. Ей, великий угодниче Божий, вознеси Богоносныя руце твоя ко иже во объятиих твоих носитися изволившему Христу Богу нашему и моли благость Его, да не отринет моления сердца моего недостоинства ради моего, но явит мне благовременне милость Свою, во славу безконечных щедрот Своих и многомощнаго предстательства твоего, о немже подобает Ему всякая слава и благодарение купно со Отцем и Пресвятым Его Духом ныне и присно и во веки веков. Аминь. Радуйся, Богоприимче старче Симеоне, во объятия приемый Спаса Господа, веселися и ты, честная пророчица Анна, возвестившая пришествие в мир Христа Бога нашего, разрушившего державу вражию и подающего нам велию милость.
Молитва святителю Иулиану Кеноманийскому
О пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю Иулиане, предстоя у Престола всех Царя и наслаждаяся света единосущныя Троицы и херувимски со ангелы возглашая песнь трисвятую, великое же и неизследованное дерзновение имея ко всемилостивому Владыце, моли спастися паствы Христовы людем, благосостояние святых церквей утверди: архиереи благолепием святительства украси, монашествующыя к подвигом добраго течения укрепи, царствующий град и вся грады и страны добре сохрани, и веру святую непорочну соблюсти умоли, мир весь предстательством твоим умири, от глада и пагубы избави ны, и от нападения иноплеменных сохрани, стары утеши, юныя настави, безумныя умудри, вдовицы помилуй, сироты заступи, младенцы возрасти, пленных возврати, немощствующыя и молящияся тебе от всех напастей и бед ходатайством твоим свободи: моли о нас Всещедраго и Человеколюбиваго Христа Бога нашего, да и в день Страшнаго Пришествия Его от шуияго стояния избавит нас, и радости святых причастники сотворит со всеми святыми во веки веков. Аминь.
Тропарь святителю, глас 4-й
Правило веры и образ кротости воздержания учителя яви тя стаду твоему яже вещей истина; сего ради стяжал еси смирением высокая, нищетою богатая, отче священноначальниче Иулиане, моли Христа Бога спастися душам нашим.
Кондак святителю, глас 2-й
Божественный гром, труба духовая, веры насадителю и отсекателю ересей, Троицы угоднице, великий святителю Иулиане, со внгелы предстоя присно, моли непрестанно всех о нас.
Величание святителю
Величаем тя, святителю отче Иулиане, и чтим святую память твою: ты бо молиши за нас Христа Бога нашего.
Молитва болящего
Пресвятая Богородице Дево, жива сущая и по смерти спасающая, присно наследие Твое, услыши воздыхание души моей, призывающей Тебя на помощь. Сниди с небесе, приди и коснися ума и сердца моего, открой зрение души моея, да узрю Тя, Госпоже моя, и Сына Твоего, Создателя, Христа и Бога моего, и уразумею, что есть воля Его и чего лишаюся аз. Ей, Госпоже моя, потщися помощью Твоею и моли Сына Твоего, да присетит мя благодатию Своею, да узами любви Его прикованный у ног Его пребуду вовеки, аще в ранах и болезни, аще недугующий и расслабленный телом, но у ног Его.