О великий угодниче Христов, истинный друже и верный рабе Всетворца Господа Бога, преблаженне (имя)! Услыши ны, многогрешныя, ныне вопиющая к тебе и призывающая имя твое святое, помилуй ны, припадающия днесь к пречистому образу твоему, приими малое наше и недостойное сие моление, умилосердися над убожеством нашим, и молитвами твоими исцели всяк недуг и болезнь души и тела нашего грешнаго, и сподоби ны течение жизни сея невредимо от видимых и невидимых врагов и безгрешно преити, и христианскую кончину непостыдну, мирну, безмятежну, и Небеснаго Царствия наследие получити со всеми святыми во веки веков. Аминь.

Глас апостола Твоего Павла услышав, глаголющ: мы, юроди Христа ради, раб Твой, Христе Боже (имя), юрод бысть на земли Тебе ради; темже память его почитающе, Тебе молим: Господи, спаси души наша.

Вышния красоты желая, нижния сласти телесныя тощно оставил еси, нестяжанием суетнаго мира, ангельское житие преходя, скончався (имя), блаженне; с нимиже Христа Бога моли непрестанно о всех нас.

Ублажаем тя, святый праведный (имя), и чтим святую память твою, ты бо молиши за нас Христа Бога нашего.

Святии новомученицы и исповедницы Церкве Российския, услышите усердную мольбу нашу! Вемы, яко нецыи от вас, еще ихже отроцы суще, послушающе о древлих страстотерпцех, в сердце своем помыслиша, колико прелюбезно и доброхвально есть таковым подражати, ни мука, ни смерть не разлучиша от любве Божия. Благо же вам, яко последовали есте вере и терпению тех, о ихже слышасте и ихже возлюбисте. А понеже на всякое время возможно есть наити на ны испытанием нечаянным, испросите от Господа нам мужества дар, иже толико благопотребен есть в житии человечестем. Вся концы отечества нашего страданьями своими освятивше, яко общии за вся ны молитвенницы, умолите Бога, избавити люди Своя от ига, ужаснейшаго паче всякаго инаго. И да отпустится нам и всему роду нашему грех, на народе российстем тяготеющий: убиение царя, помазанника Божия, святителей же и пастырей с паствою и страдания исповедников, и осквернение святынь наших. Да упразднятся расколы в Церкви нашей, и да будет все едино, и да изведет Господь на жатву делатели Своя, си есть да не оскудевает Церковь пастырьми добрыми, иже имуть просвещати светом истинныя веры столь великое множество людей в вере ненаученных или от веры отвратившихся. Недостойни есмь мы милости Божия, обаче страданий ради ваших Христос Бог наш да ущедрит и помилует всех нас, в помощь вас призывающих. Мы же Ему, Спасителю нашему, со Отцем и со Святым Духом сокрушение о гресех и благодарение за вся всегда да приносим, славяще Его во веки веков. Аминь.

Днесь радостно ликует Церковь Русская, яко мати чада, прославляющи новомученики и исповедники своя: святители и иереи, царственныя страстотерпцы, благоверныя князи и княгини, преподобныя мужи и жены и вся православныя христианы, во дни гонения безбожнаго жизнь свою за веру во Христа положившия и кровьми истину соблюдшия. Тех предстательством, Долготерпеливе Господи, страну нашу в Православии сохрани до скончания века.

Якоже плод красный Твоего спасительнаго сеяния, земля Российская приносит Ти, Господи, вся святыя, в той просиявшия. Тех молитвами в мире глубоце, Церковь и страну нашу Богородицею соблюди, Многомилостиве.

Днесь лик святых, в земли нашей Богу угодивших, предстоит в Церкви и невидимо за ны молится Богу. Ангели с ними славословят, и вси святии Церкви Христовы ему спразднуют, о нас бо молят вси купно Превечнаго Бога.

Днесь новомученицы Российстии в ризах белых предстоят Агнцу Божию и со Ангелы песнь победную воспевают Богу: благословение, и слава, и премудрость, и хвала, и честь, и сила, и крепость нашему Богу во веки веков. Аминь.

О всеблаженнии и богомудрии угодницы Божии, подвиги своими землю Русскую освятившии и телеса своя, яко семя веры, в ней оставльшии, душами же своими престолу Божию предстоящии и непрестанно о ней молящиися! Се ныне в день общаго вашего торжества, мы, грешнии, меньшия братия ваши дерзаем приносити вам сие хвалебное пение. Величаем ваши великие подвиги, духовные воины Христовы, терпением и мужеством до конца врага низложившии и нас от прелести и козней его избавляющии. Ублажаем ваше святое житие, светильницы божественнии, светом веры и добродетелей светящиися и наши умы и сердца богомудренно озаряющии. Прославляем ваша великая чудеса, цвети райстии, в стране нашей северней прекрасне процветшии, и ароматы дарований и чудес, повсюду благоухающии. Восхваляем вашу богоподражательную любовь, предстателие наши и покровителие, и, уповающе на помощь вашу, припадаем к вам и вопием: вси святии сродницы наши, от лет древних просиявшии и неявленнии, ведомии и неведомии! Помяните нашу немощь и уничижение и молитвами вашими испросите у Христа Бога нашего, да и мы, безбедно преплывше житейскую пучину и невредимо соблюдше сокровище веры, в пристанище вечнаго спасения достигнем и в блаженных обителех Горняго отечества вкупе с вами и со всеми угодившими Ему от века святыми водворимся благодатию и человеколюбием Спасителя нашего Господа Иисуса Христа, Емуже со Превечным Отцем и со Пресвятым Духом подобает непрестанное славословие и поклонение от всех тварей во веки веков. Аминь.

Владыко Христе Боже, Иже страстьми Своими страсти моя исцеливый и язвами Своими язвы моя уврачевавый, даруй мне, много Тебе прегрешившему, слезы умиления; страствори моему телу от обоняния Животворящаго Тела Твоего, и наслади душу мою Твоею Честною Кровию от горести, еюже мя сопротивник напои; возвыси мой ум к Тебе, долу поникший, и возведи от пропасти погибели, яко не имам покаяния, не имам умиления, не имам слезы утешительныя, возводящия чада ко Своему наследию. Омрачихся умом в житейских страстех, не могу воззрети к Тебе в болезни, не могу согретися слезами, яже к Тебе любве. Но, Владыко Господи Иисусе Христе, Сокровище благих, даруй мне покаяние всецелое и сердце люботрудное во взыскание Твое, даруй мне благодать Твою и обнови во мне зраки Твоего образа. Оставих Тя, не остави мене, изыди на взыскание мое, возведи к пажити Твоей и сопричти мя овцам избранного Твоего стада, воспитай мя с ними от злака Божественных Твоих Таинств, молитвами Пречистыя Твоея Матере и всех святых Твоих. Аминь.

Господи Вседержителю, Боже Отец наших, Авраамов и Исааков и Иаковль и семене их праведнаго, сотворивый небо и землю со всею лепотою их и связавый море словом повеления Твоего, заключивый бездну и запечатствовавый ю страшным и славным именем Твоим, Егоже вся боятся и трепещут от лица силы Твоея, яко никтоже постоит пред великолепием славы Твоея, и нестерпимь гнев, еже на грешники, прещения Твоего. Безмерна же и неизследованна милость обещания Твоего: Ты бо еси Господь, вышний, благоутробен, долготерпелив и многомилостив и каяйся о злобах человеческих. Ты, Господи, по множеству благости Твоея обещал еси покаяние и оставление согрешившим Тебе, и множеством щедрот Твоих определил еси покаяние грешником во спасение. Ты убо, Господи Боже сил, не положил еси покаяние праведным: Аврааму и Исааку и Иакову, не согрешившим Тебе, но положил еси покаяние мне, грешному, за-не согреших паче числа песка морскаго. Умножишася беззакония моя, Господи, умножишася беззакония моя, и несмь достоин воззрети и видети высоту небесную от множества неправд Твоих. Слячен есмь многими узами железными, во еже не возвести главы моея, и несть ми ослабления, зане прогневах ярость Твою и лукавое пред Тобою сотворих: не сотворивый воли Твоея и не сохранивый повелений Твоих, поставих мерзости и умножих претыкания. И ныне приклоняю колена сердца, требуя от Тебе благости. Согреших, Господи, согреших, и беззакония моя аз вем, но прошу моляся: ослаби ми, Господи, ослаби ми, и не погуби мене со беззаконии моими, ниже в век враждовав соблюдеши зол моих, ниже осудиши мя в преисподних земли. Зане Ты еси, Боже, Бог кающихся, и на мне явиши всю благость Твою, яко недостойна суща спасеши мя по мнозей милости Твоей, и восхвалю Тя выну во днех живота моего, яко Тя поет вся сила небесная, и Твоя есть слава во веки веков. Аминь.