Христос в Сион сего, и цари звездою наставляя звездоблюстители влечет. Тем воспевающе воспоим: да благословит тварь вся Господа и превозносит во вся веки.

И ныне: Корысти Вавилон… (Повторить предыдущий тропарь.)

Песнь 9

Ирмос: Таинство странное вижу и преславное; небо, вертеп; Престол Херувимский, Деву; ясли, вместилище, в нихже возлеже невместимый Христос Бог, Егоже воспевающе величаем.

Изрядное течение зряще волсви необычныя новыя звезды новосияющия, небеса просвещающия, Христа Царя знаменующия на земли рождшагося в Вифлееме на спасение наше.

Новорожденное, волхвом глаголющим, Отроча Царь, Егоже звезда яви, где есть? Тому бо поклонитися приидохом; яряся Ирод смущашеся, Христа убити, богоборец шатаяся.

Слава: Испыта Ирод время звезды, еяже вождением волсви в Вифлееме покланяхуся Христу с дары; еюже ко отечеству наставляеми, лютаго детоубийцу оставиша поругана.

И ныне: Испыта Ирод… (Повторить предыдущий тропарь.)

Светилен

Посетил ны есть свыше Спас наш, Восток востоков, и сущии во тме и сени обретохом истину, ибо от Девы родися Господь.

1 (14) января

Песнь 1

Ирмос: Грядите, людие, поим песнь Христу Богу, раздельшему море и наставльшему люди, яже изведе из работы египетския, яко прославися.

Припев:Слава Тебе, Боже наш, слава Тебе.

Осмерица дней, носящая образ будущаго, Твоею Христе просвещается и освящается вольною нищетою; в сей бо законно обрезался еси плотию. (Дважды.)

Слава: Обрезание приемлет осмодневное Христос Своего Рождества, и сего днесь сень спрятает, свет возсиявая новыя благодати.

И ныне: Обрезание приемлет… (Повторить предыдущий тропарь.)

Песнь 3

Ирмос: Утверди нас в Тебе, Господи, древом умерщвлей грех и страх Твой всади в сердца нас, поющих Тя.

Слово воплощшееся пресущественное, в престатие закона обрезася; начаток же Божественнымя благодати, и жизнь нетленныя нам подаде. (Дважды.)

Слава: Закона исполнитель, не яко сопротивен Богу сый Христос воплотивыйся показася, и сподобися волею обрезатися осмодневен.

И ныне: Закона исполнитель… (Повторить предыдущий тропарь.)

Седален, глас 4-й

Яко сый бездна человеколюбия, одеялся еси, Владыко, в зрак рабий и плотию обрезался еси, даруя всем человеком великую Твою милость.

Песнь 4

Ирмос: Услышах, Господи, слух Твоего смотрения, и прославих Тя, Едине Человеколюбче.

Обрезание преста, отнележе Христос волею обрезася, язык множество спасая благодатию. (Дважды.)

Слава: Будущаго непрестанную осмаго века жизнь изображает, в нюже Владыка обрезася плотию.

И ныне: Будущаго непрестанную… (Повторить предыдущий тропарь.)

Песнь 5

Ирмос: Света подателю, и веков Творче, Господи, во свете Твоих повелений настави нас; разве бо Тебе иного Бога не знаем.

Ты от Девы Матере несказанно прошед, Господи, и в человеческий не сподобился еси одеятися образ, яко младенец законно, закон исполнил еси. (Дважды.)

Слава: Нощи уподобися, яко сень законную любящи Израиля, рождшая, из Неяже облиставший свет мира Христос явися.

И ныне: Нощи уподобися… (Повторить предыдущий тропарь.)

Песнь 6

Ирмос: Бездна мя многа греховная окружает, и вопию Ти, пророка подражаяй: от тли мя, Господи, возведи.

Прият конец закон, отнележе Христос младенствовав, исполнитель закона сый, обрезание восприят, и разреши законную клятву. (Дважды.)

Слава: Субботство, обрезания же шатания еврейскаго, явльшагося Христа мановением преста, и возсия благодати весна.

И ныне: Субботство, обрезания… (Повторить предыдущий тропарь.)

Кондак, глас 3-й

Всех Господь обрезание терпит, и человеческая прегрешения яко Благ обрезует, дает спасение днесь миру; радуется же в вышних и Создателев иерарх и светоносный Божественнымй таинник Христов Василий.