В лето 6746 (1238). Прииде царь Батый ратию и силою татарской на землю Русскую, и плениша грады многи, и идоша и до Игнаца хреста, и ту возвратишася.

В лето 6747 (1239). Избиша Литва на Камне пскович засадою, месяца сентября в 25 день.

В лето 6748 (1240). Приидоша немцы Швеянь в реку Неву, и победи их князь Александр с мужи новгородцы, месяца майа в 15 день.

В лето 6748 (1240). Избиша немцы пскович под Изборском 600 муж, месяца сентября в 16 день. И по сем пришедше немцы и взяша град Псков, и седоша немцы в Пскове 2 лета.

Взяша немцы, медвежане и вельянцы, юрьевцы с князем Ярославом Володимировичем Избореск, и выидоша псковичи и бишася с ними, и побиша я немцы, а иных руками яша, и пришед под Псков, посад пожгоша и сташа под городом неделю, и отидоша, поимав дети у добрых людей в таль. Бяху бо перевет держали с немцы плесковичи: подвел Твердила Иванкович с инемы, а сам нача владети Псковом с немцы, воюа села новгородцкая, а инии плесковичи виидоша в Новгород с женами и детми.

В лето 6749 (1241). Взя князь Александр городок Копорию, а немцев изби. А на другое лето ходил князь Александр с мужи новгородцы, и бишася на леду с немцами.

В лето 6750 (1242). Пришед князь Александр и изби немец во граде Пскове, и град Псков избави от безбожных немец, помощию святыя Троица. И бишася с ними на леду, и пособи Бог князю Александру и мужем новгородцам и псковичам, овы изби и овы связав босы поведе по леду. Сии бои бысть месяца апреля в 1 день; и бысть во граде Пскове радость велия. И рече князь Александр: «О муже псковичи, се же вам глаголю: аще кто и напослед моих пленник или прибежит кто в печали или тако приидет жити во град Псков, а вы его не приимете и не почтете его, и наречетеся вторая жидова».

В лето 6755 (1247). Избиша Литва пскович на Кудепи, месяца июля в 3 день.

В лето 6772 (1262). Ходиша Ярослав Ярославич и Дмитрий Александрович и Товтивил Полочский, новгородцы и псковичи и полочаны под Юрьев, единым приступом три стены взяша, а немцы избиша, а самы здоровы придоша.

В лето 6773 (1265). Взя Воишегл землю Литовскую, а Домонт прибеже в Псков и крестися.

В лето 6774 (1266). Ходил князь Домонт с мужи псковичи, и плени землю литовскую, и погону побиша.

В лето 6776 (1268). Князь Дмитреи и Ярослав с полки новгородскими идоша к Раковору и бысть побоище силно, месяца февраля в 18 день, в суботу.

Князь Домонт с мужи своими псковичи иде к Раковору, и бишася с немцы и одолеша. Тою же лета, месяца априля 23, князь Домонт изби немец 8 сот на реце на Мироповне. И по том пакы, того же лета, князь местер, совокупи воя многы и прииде ко Пскову; и князь Довмонт победи я, и тако побегоша посрамлени, месяца июня 18, на память святого мученика Феодора Стратилата.

В лето 6792 (1284). Бысть знамение в луне, месяца декабря 24, в день недельный. И по двою недель месяца января во 12 день, избиша немцы пскович на дани, у Волысту, 40 муж; якоже древле и хронографы глаголют, яко знамение несть на добро, но на зло присно является.

В лето 6801 (1293). Князь великии Дмитрии Александрович прибеже в Псков, и прияша и честно.

В лето 6807 (1299). Бысть знамение в луне, месяца сентября во 8 день. Тое же зимы изгониша немцы ратию посад у Пскова, месяца марта в 4 день, избиша черньцов и черниц и убогия и жены и малые дети, а мужи Бог ублюде. И на утрии же день приступиша ко граду, хотяше град Псков пленити, а князя Довмонта руками няти. Домонт же князь выехав со Иваном Дорогомиловичем и с мужи псковичи, и помощию святые Троицы воополчившеся и ударишася на безбожных немец и победиша я у святого Петра и Павла на брезе; овы избиша, а иныя поимаша живы, а прочии вскоре устремишася на брег. Тогда же мор бяше на людех. Тогда же и Благоверный князь Домонт преставися, месяца маиа 20 день; и плакахуся его много псковичи, и положиша его в дому святыя Троицы.

В лето 6811 (1303). Бысть зима тепла без снега и бысть хлеб дорог велми. Того же лета Избореск поставлен бысть на новом месте.

В лето 6816 (1308). Борис посадник замысли помостити Торговище, и бысть всем людем добро.

В лето 6817 (1309). Борис посадник с плесковичи заложи стену плитяну от святого Петра и Павла к Великой реке.

В лето 6818 (1310). Заложена бысть церковь святыя Богородица на Снетныя горы, каменая, при игумене Иове, и совершена бысть в лето 6819.

В лето 6721 (1213). В Петрово говенье изъехаша Литва безбожная Плесков и пожгоша, плесковицы бо бяху в то время изгнали князя Володимира от себе, а плесковицы бяху на озере, и много створиша зла и отъидоша.

В лето 6736 (1228). Князь Ярослав поиде в Плесков с посадником Иванком и тысячским Вячеславом. И слышавше плесковицы, яко идет к ним князь, и затворишася в городе, не пустиша к собе; князь же, постоя на Дубровне, вспятися в Новгород, промкла бо ся весть бяше си в Плескове, яко везет оковы, хотя ковати вяцшее мужи. И пришед, створи вече в владычни дворе и рече, яко «не мыслил есмь до плескович груба ничегоже; везл есмь был в коробьях дары: паволоки и овощь, а они мя обощъствовали» и положи на них жалобу велику. Тогда же приведе полки ис Переяславля, а река: «Хочю ити на Ригу»; и сташа около Городища шатры, а инии в Славне по дворам. И вздорожиша все на торгу: и хлеб, и мясо, и рыбы, и оттоле ста дороговь: купляху хлеб по 2 куне, а кадь ржи по 3 гривне, а пшеницю по 5 гривен, а пшена по 7 гривен, и тако ста по 3 лета. То же слышавше плесковици, яко приведе Ярослав полки, убоявшеся того, взяша мир с Рижаны, Новгород выложивше, а рекуче: «то вы, а то новгородцы, а нам ненадобе; но оже поидуть на нас, то вы нам помозите»; и они рекоша: «тако буди»; и пояша у них 40 муж в талбу. Новгородцы же, уведавше, рекоша: «князь нас зовет на Ригу, а хотя итти на Плесков». Тогда же князь посла Мишю в Плесков, река: «поидите с мной на путь, а зла до вас есмь не мыслил никоторого же; а тех ми выдадите, кто мя обадил к вам». И рекоша плесковицы, приславше Гречина: «тобе ся, князь, кланяем и братьи своей не выдаем, а с рижаны есме мир взяли. К колываню есте ходивше, серебро поимали, а сами поидосте в Новгород, а правды не створися, города не взясте, а у Кеси такоже, а у Медвеже головы тако же; а за то нашю братью избиша на озере; а инии поведени, а вы, раздравше, та прочь; или есте на нас удумали, то мы противу вас с святой богородицею и с поклоном, то вы лучше нас исечите, а жены и дети поемлете себе, а не луче погании; то вас ся кланяем». Новгородцы же князю рекоша: «Мы бе своея братья бес плесковиц не имаемся на Ригу; а тобе ся, княже, кланяем». Много же князь нудив, ине яшася по путь. Тогда же князь Ярослав полкы свои домовь посла. Плесковици же тогда бяху подвегли немцы и чудь, латыголу и либь, и отпустиша я опять, а тех, кто имал придаток у Ярослава, выгнаша ис Плескова: «пойдите по князю своем, нам есте не братья». Тогда же Ярослав поиде с княгинею из Новгорода Переяславлю, а Новегороде остави два сына своя, Феодора и Александра, с Федором Даниловичем, с тиуном Якимом.